Grazie Don Bosco, poesia di Rocco Criseo
Oggi è Festa per me che sono cresciuto all’oratorio e ho frequentato le scuole salesiane. Devo molto a questo Santo che dedicò la sua vita ai giovani e ai Padri Salesiani maestri di sani e fruttuosi insegnamenti.
U SANTU DI GIUVENI
Don Boscu patri santu
Maestru i tutti nui
Di quandu eu nascia
Sentia parrari i vui
Mi disseru ca fustivu
Nu previti speciali
Nu sognu vi mmusciau
A strata di pigghjiari
Nu viaggiu assai gravusu
Ma chinu di speranza
Passari a propria vita
A menz’a figghjolanza
Era l’ottu di dicembri
E ccu n’ Avi Maria
Nasciu l’ oratoriu
Intra a na sacrestia
Ddu sognu chi facistivu
Accorpu fu palisi
E fu cusi’ chi previti
Rrivaru o me pajsi
Chi jochi e chi prejeri
E puru cu li scoli
Passaru i ddu cortili
Na murra di figghjoli
Mpararu tutti quanti
Mi su bravi cristiani
Bon patri di famigghja
E onesti pajsani
Pur’eu tra tanti autri
Passai di chidda scola
Ricordu ddi jornati
Comu si fussi ora
A missa la matina
E poi subitu in classi
Na ura di latinu
E nautra di sintassi
Eranu autri tempi
Nautru modu i fari
E carchi scorcicoddu
Non ndi faciva mali
Dopu cchju’ d’un seculu
Si vidinu li frutti
Cu metudu i Don Boscu
E’ canusciutu i tutti
Cu li boni maneri
Inveci i cundannari
Sta figghjolanza d’oji
Potimu nui jutari
Allura si carcunu
Ancora non mparau
Chiddu chi st’omu Santu
A tutti ndi nsegnau
U dittu di Don Boscu
M’è sempri u nosciu vantu
“Basta chi siti giuveni
Ca eu vi amu tantu”
Rocco Criseo